Wuchenänd-Toure

Kukuk Zäme

Das Wuchenänd isch nid ganz so cho, wi ursprünglech planet. Es wär eigentli e 2-Tages-Tour i französisch Jura ufem Programm gstange, woni no mau gäg die 500 km hät wöue fahre, aber us truurige familiäre Gründ, hani das leider nid chönne/wöue umsetze.

Es si de chli weniger Kilometer worde, aber d’Toure, woni gmacht ha, si nid minger schön gsi 🙂

Am Samschti Morge früeh hani mi Richtig Ämmitau ufe Wäg gmacht – schön agnähmi Temperature, schöni Morgestimmig, no weni Verchehr. Ha e Rundi gmacht vo Burgdorf nach Hasle-Rüegsau, Lauperswil, Signau, Martinsegg, Eggiwil, Blapbach, Lüderenalp, Wasen, Schonegg, Weier, Lueg wieder zrug uf Burdelf. Isch churz aber mit sehr viu steile Ufstiege doch rächt knackig 🙂

94 Km / 1700 Hm / 3 h 55 min. / Schnitt 24.0 Km/h

Di letschte paar Täg si leider rächt chräftezerrend gsi, weshaub ig mir am Sunnti usschlafe gönnt ha (guet, das het de öpe 08.15 gheisse :-P)… ha mi miteme usgiebige Zmorge gstercht u bi de am 10 losgradlet. E wunderschöni Tour ufe Chasseral hani gnosse! Z’Panorama übers Seeland mit sine 3 See isch troumhaft gsi! U sogar d’Bärgchötti het me trotz paar Wuche chönne gseh. O d’Härefahrt düre Buechibärg u em Jura mit au sine schöne Dörfer isch wunderbar gsi.

150 Km / 2000 Hm / 5 h 41 min. / Schnitt 26.2 Km/h (bini auso z’friede mit däm viele Gägewind, woni uf dr Rückfahrt ha gha)

Newsletter 

 

Sponsoren 

 

Nächster Anlass 

 

Impressum 

 

Kontakt 

 
Bikeschule Olten
Fabian Spielmann
Brückenstrasse 48
4632 Trimbach
___________________
Phone: +41 (0)79 417 26 23
Email: info@bikeschule-olten.ch