Letschte Vorbereitige

Tschou zäme

Es isch sowit u mir si ir Wuche vor Tortour aglangt. Äääääändlech – nach so viu Mönet Vorbereitig bini jtz auso froh, dasses sowit isch u d’Vorfröid isch riesegross! 🙂 Aber es het no e Huufe z’tüe gä i de letschte paar Täg. U gäng u gäng hani mi gfragt…hmmm, hani äch a aus dänkt? We me d’Föteli aluegt mit dene Bärge a Sache söts eim doch dünke, dassi meh aus gnue drbi ha 😀

Beträffend Chleiderwauh isch z’Wätter natürlech massgäbend u momentan gseh ja beid Täg leider rächt unbeständig us. Grad dr Friti, wos über d’Aupe ygeit u me wit ueche fahrt, wird äuä de grad zure grosse Herusforderig wärde – ig rächne jedefaus mitere Kombination us nass u chaut, was so ungefährt z’schlimmschte isch… wenni a die ca. 30 minütige Abfahrt vom Sustepass dänke, tschuderets mi scho jtz 😉 I bi froh, hani grad letscht hi so forderndi Bedingige gha ar Aupe Challenge, de chame sech nämlech besser druf ysteue. Uf jede Fau hani vo Summer- über Winerchleider eifach aus ypackt… 😀 i bi sorgar no chli ga shoppe u ha no es paar zuesätzlechi warmi Chleider kouft. Chaut ha u dürnässt si, isch o es «Todesurteil» fürnes setigs Renne.

Näbscht de Chleider bruchts o e sorgfäutegi Planig für d’Verpflegig. Was nimmi z’trinke? Wi viu bruchts? Weli Bidongrössi nimi? Weli Riegle, Gels etc. söui mitnäh? Uf was hani de Luscht? Ah chli Schoggi muess si…u d’Biberli hei mi letsch Jahr o über d’Rundi brunge, Mandle o immer wieder guet u sehr nährhaft u Banane si o nid wäg zdänke. Aber z’Thema isch sehr individuell u sisch sehr wichtig, dass me vorhär teschtet het, was me vertreit u was eim guet tuet.

O dr Punkt «Elektronik» fingi immer schwierig… hei mir gnue Lichter, gnue Lademüglechkeite etc. När hani no es 2. GPS müesse uslehne, wiu eis ja nid so lang düre het. Witer hei mir aui Handy, wo ab u zue müesse glade wärde, mir hei e Funkverbindig (dert hei mir zum Glück no Ersatzakkus becho u o die hani müesse organisiere).

Ig ha mittlerwile fasch aus packt u bi hüt Nami üses Bösli ga hole. Morn Obe tuenis de belade u am Mittwuch Nami reisi de mit dr männleche Heufti 😀 vo mim Team uf Schaffhuse. Am Donnsti gö mir de ads Check-In, beschrifte z’Outo, gö am Mittag ad Pasta-Party (denn trudle de o di beide Mädels y) u am Nami isch de mau no z’Briefing u dr Prolog. När gö mir no hurti ga Chohlehydrat mampfe u de isch de e sehr churzi Nachtrueh agseit.

Am Friti Morge, 18. August – 00.30 h mache mir üs uf die längi asträngendi, aber sicher mega kuuli Reis! 🙂 Aui, wo üs gärn wete fouge, chöi z’App «Tractalis» abelade. Dert dr richtig Sportevent uswähle –> Tortour (nid Tortour Sprint oder Tortrour Challenge). Unge unger «Teams» finget dir mi i dr «Solo Women»-Kategorie u we dir uf mi Name klicket, chöi dir «follow» aktiviere. Somit erschient unger «Maps» immer mi aktuell Standort (es Fähnli mit mire Startnummere, em 128i).

Für aui, wo währendem Renne es paar Ydrück wete mitbecho, hani no e Facebook-Site ygrichtet «Tortour 2017 / Sue aus Solofahrerin». We dir die «liket», gseht dir immer öpe chli, wis üs geit, wiu dert mis Team währendem Renne immer wieder chli Sache wird poste (Fotos, Viedeos etc.),

Natürli würdi mi o riesig fröie, we mi Fründe am Strasserand chöme cho afüüre:-)

Bis gli, liebs Grüessli Sue

Newsletter 

 

Sponsoren 

 

Nächster Anlass 

 

Impressum 

 

Kontakt 

 
Bikeschule Olten
Fabian Spielmann
Brückenstrasse 48
4632 Trimbach
___________________
Phone: +41 (0)79 417 26 23
Email: info@bikeschule-olten.ch