Camping- und Veloferie am Lac de Chalain, FR

Gugseli

I ha letscht u vorletscht Wuche wunderschöni Ferie im französische Jura bim Zäutle mit dr ganze Familie gnosse (Eutere, Brueder u Schwöschter mit ihrne Familie, Ungle, Tante, Cousinene). Natürli isch aber nid nume Umeplegere ufem Programm gstange, da Tortour praktisch vor dr Tür steit. Die erschte 2 Täg si wättertechnisch himmutruurig u chaut gsi, so dass ig de lieber bi ga ume See seckle aus ga Velöle. U när het sech de z’Sünneli gott sei dank regumässig zeigt, so dass ig es paar sehr schöni Toure ha chönne mache. Z’Highlight isch definitiv d’Sichtig vomene Luchs gsi – ha gmeint ig gseh nid rächt u bi de auso o grad chli verschrocke. Wo de dä Luchs ersch nacheme churze Göisse mineresits isch i Busch ghüpft u mi dert gäng no lang gmuschteret u studiert het, hanis de doch sicherer gfunge, langsam ume witer zfahre, nid dass dä Luchs no uf dummi Gedanke wär cho 😉 Näbst em Spörtle hani z’Familie-Läbe enorm gnosse – zäme chöcherle/ässe, Fäderbäuele, Höuzlispiu (weiss nüm wis gheisse het), Lottone (o weme mängisch nid die Priisli abgruumt het, wome gärn hät gha ;-)) es isch eifach gmüetlech gsi! Zum Velo fahre ischs doch o no rächt asträngend, da’s doch ständig ufe u aube geit u mi merkt ersch am Schluss, wie viu Höhemeter me eigentli zrugg gleit het. Landschaftlech hanis top gfunge u ha mi grad entschlosse im Herbst die farbige Loubwäuder ga z’gniesse. Strasse si z’Frankrich nid grad so guet ungerhaute wie ir Schwiiz, drfür gits e umängi a chline ländleche Strasse mit weni Verchehr. I ha i dene Ferie mini letsche Kilometer gmacht zum mis Trainingsziu z’erreiche – YEAH! 😀

Newsletter 

 

Sponsoren 

 

Nächster Anlass 

 

Impressum 

 

Kontakt 

 
Bikeschule Olten
Fabian Spielmann
Brückenstrasse 48
4632 Trimbach
___________________
Phone: +41 (0)79 417 26 23
Email: info@bikeschule-olten.ch